விண்ணகமும் மண்ணகமும் வியந்துரைக்க வந்துதித்த
அண்ணலான நபிமகளார் அருமையான பாத்திமத்தே

தங்கு புகழ் அன்னையர்க்கும் தங்கமான தங்கையர்க்கும்
சங்கமான மங்கையர்க்கும் சங்கையான பாத்திமத்தே

பெண்களுக்குக் கண்மணியாய்ப் பெரியவர்க்கு விண்மணியாய்
பண்பிருக்கும் நன்மணியாய் பாருயர்த்தும் பாத்திமத்தே

அன்பு காஸிம் உம்மு குல்தூம் அப்துல்லா ருகையா ஜைனப்
இன்ப தாஹிருடன் பிறந்த இன்னமுதே பாத்திமத்தே

இன்ஜமாதுல் ஆகிர் மாதம் இருபது நாள் சென்ற பின்னர்
மென் கதீஜா வயிற்றுதித்த மேன்மை ஸித்தி பாத்திமத்தே

செங்கதிரோன் பொற்குழம்பைச் சிந்தவந்த வெள்ளி காலை
மங்களமாய் வந்துதித்த மாமணியே பாத்திமத்தே

அருளிருக்கும் பொருளிருக்கும் அகன்றிருக்கும் பாரிடத்தின்
கருவிருக்கும் திருநபிக்குக் கனிவளிக்கும் பாத்திமத்தே

ஓடியாடிப் பாட வேண்டும் ஓட்டிளமைப் போதிறையை
நாடியோடித் தனித்திருந்த நற்கொடியே பாத்திமத்தே

பிஞ்சு போலும் அஞ்சதனில் பிரியமான அன்னையாகும்
துஞ்சவிறையைத் தஞ்சமானீர் தூய்மையார்ந்த பாத்திமத்தே

கருணையாரும் பெருநபியின் காலடியைப் பள்ளியாக்கி
பெருங் குணத்தின் பயிற்சியெல்லாம் பெற்ற பதூல் பாத்திமத்தே

வறுமை நாணம் நன்றி தானம் மனவடக்கம் இறையுணர்வு
பொறுமையாதி அணி சிறக்கும் புகழொளியே பாத்திமத்தே

புவியளிப்போர் பணிய வந்த புனிதனாரின் புதல்வியாகிக்
கவியளிக்கும் எளிய வாழ்வால் கவினடைந்தீர் பாத்திமத்தே

மாசிலாலும் மியல் பறிந்து மணல் விழைந்த மாண்பலியார்
ஈசனோடு பேசியேற்ற இன்பரிசே பாத்திமத்தே

கனிசிறக்கும் வேந்தரெல்லாம் கணவராகக் காத்திருந்தும்
எளியரான அலிப்புலியை ஏற்று வந்தீர் பாத்திமத்தே

பெருநபியின் புதல்வியாகி பேரறிஞர் துணைவியாகி
பெருமை சான்றோ ரன்னையாகும் பேறு பெற்றீர் பாத்திமத்தே

மருள் பெருக்கி இருள் வளர்க்கும் மாயவாழ்வின் தன்மையெல்லாம்
அருள் பெருக்கும் அரிய வாழ்வால் அடர்த்து வென்றீர் பாத்திமத்தே

கார் சுமக்கும் திருநபியின் கவின் சுமக்கும் புதல்வியாய் தண்
ணீர் சுமந்த வடு சுமக்கும் நேர்மை பீவி பாத்திமத்தே

கை சிவக்க மாவரைத்தும் கண்சிவக்க அடுப்பெரித்தும்
மெய்வியர்க்க வீட்டு வேலை மேவுமெங்கள் பாத்திமத்தே

அருளிறையைக் காலை நேரம் அன்புடனே வணங்குவோரும்
திருகை சுற்றும் அரவமுற்றுத் திகைப்படைந்தார் பாத்திமத்தே

மண்ணரரசர் உடையுணவில் மாளிகையில் மகிழ்ந்திருக்க
விண்ணரசா யெளிமையேற்று வியப்பளிப்பீர் பாத்திமத்தே

கடுங்குளிரால் நடுங்குமெழை கவலை போக்க மணவுடையைக்
கொடையளித்து பழையவாடை கொண்டு நின்றீர் பாத்திமத்தே

பசி தணிக்க கிடைத்த ரொட்டி பரிதவிக்க வந்த வேளை
புசிப்பதற்கு கொடுத்து விட்டு புகழடைந்தீர் பாத்திமத்தே

தொழுகைப்பாயி லன்றித் தூங்கும் தலையணையில் துளிர்த்திடாமல்
அழுத கண்ணீர் இறைவனுக்கே அர்ப்பணித்தீர் பாத்திமத்தே

உரை சிறக்கும் அண்ணலாரின் உளம் வருந்த ஏதுவான
திரைகடகம் நீக்கிவிட்ட தீன் முழங்கும் பாத்திமத்தே

வீட்டலுவல் பார்ப்பதற்கோர் வேலையாளை கேட்டதற்கு
நாட்டையாளும் நல்ல தந்தை நாட்டமற்றார் பாத்திமத்தே

அருமையான ஈது நாளில் ஆடை வேண்டும் புதல்வருக்காய்
உருகி நின்றே இறையிடத்தில் உளந்திறந்தீர் பாத்திமத்தே

நல்லசெந்தே னன்ன மெய்க்கு நன்மையூட்டும் நல்லுரைகள்
பல்லவையோர் புகழுமாறு பகர்ந்த பீவி பாத்திமத்தே

புனிதமான பூவையர்க்குப் பொலிவளித்து வாடுகின்ற
வனிதையர்க்கு வாழ்வளிக்க வந்ததேனே பாத்திமத்தே

மாண்பிறப்பின் பயனளிக்கும் மாநபிக்குக் காவலாகி
மாண்பளித்த அபூதாலிப் மருகியாகும் பாத்திமத்தே

நீதி வாழ்த்த நேர்மை காத்து நீணிலத்தை ஆட்சி செய்த
மாதிரங்கள் போற்றுமுமர் மாண்பறிந்த பாத்திமத்தே

கோவுரைக்கும் திருமறையைக் கோத்தளித்துச் சீர் மிகுந்த
கோவையாக்கும் நல்லுதமான் கொழுந்தியாகும் பாத்திமத்தே

பெருமையான வீரருக்குப் பேரணியாம் அலி தமக்கே
ஒருமையான துணைவியாகும் உரிமையான பாத்திமத்தே

வையகத்தி லிசைப்பரப்பி வானகத்தைச் சென்றடைந்த
சையிதான பேர்களுக்குச் சிறப்பளிக்கும் பாத்திமத்தே

பூவுறங்கப் புள்ளுறங்கப் புவனமெல்லாம் ஆழ்ந்துறங்க
நாவுறங்கா திருந்திறையின் நாமமோதும் பாத்திமத்தே

வேத நபி தூதுரைகள் வெற்றி காண அருள் பொழிந்த
நாதனொளி பெற்றுயர்ந்த நாயகியே பாத்திமத்தே

தேன்பொழியும் பெண்ணினத்தார் தேய்வகற்றும் பொன்னுரைகள்
வான்மழையாய்ப் பொழிந்துதவி வளங்கொழிக்கும் பாத்திமத்தே

சொற்களிலும் செயல்களிலும் சோர்வுகாணா தெந்நாளும்
கற்புயர்வும் நற்குணமும் காத்துவந்தீர் பாத்திமத்தே

தந்தையார் தம் தொழுகை வேளை தருக்குடைய வன்பகைசெய்
சிந்தையற்ற செயல்களுக்காய் சிந்தை நொந்தீர் பாத்திமத்தே

கோதுமையை கையரைக்க கோவுரையை நாவுரைக்க
போதுமென்ற பொன்மனத்தால் பொலிவடைந்தீர் பாத்திமத்தே

செங்குரதி பொங்கிவர செருக்களத்தில் பல்லிழந்த
தங்கு புகழ் தந்தையர்க்காய் தளர்ந்து விட்டீர் பாத்திமத்தே

போர் முகத்தில் வாய்மை நாட்டிப் புண்ணடைந்த வீரர் தம்மைப்
பார்வையிட்டுப் பணிவிடைகள் பரிந்து செய்தீர் பாத்திமத்தே

அருமையான அலிப்புலியும் அன்புருவாம் ஹஸன் ஹுஸைனும்
உருகக் கண்டும் உலக வாழ்வை உதறி விட்டீர் பாத்திமத்தே

விண்ணிடந்தில் அண்ணல் நபி வீற்றிருத்தல் காணவோதான்
மண்ணகத்தை விரைவில் நீந்து மறைந்து விட்டீர் பாத்திமத்தே

மாண்ரமலான் மாதமுள்ள வான் சிறப்பைக் காண்பதற்கோ
ஆண்டிருபத் தெட்டினுள்ளே அவனி நீத்தீர் பாத்திமத்தே

வஞ்சகர்கள் நஞ்சளிக்க வாய்மையான நல் ஹஸனார்
துஞ்சு காட்சி முன்னுணர்ந்தோ துஞ்சி விட்டீர் பாத்திமத்தே

கண்ணுஸைனும் காசிமாரும் கர்பலாவில் பெறவிருந்த
விண்பரிசை முன்னறிந்தோ விண்ணடைந்தீர் பாத்திமத்தே

காலைப் போதே குளித்து வந்து கடமையாற்றிக் கபனணிந்து
மாலைப் போதே மவுத்துமானீர் மாண்பொளிரும் பாத்திமத்தே

ஒப்பில்லாத தந்தையர் பால் ஓங்குமன்பால் மறைந்த பின்பும்
தப்பிடாமல் தொடர்ந்து செல்லும் தன்மை பெற்றீர் பாத்திமத்தே

நேசமிக்க ஆசியா நன் நெறியினின்ற மறியம்மா
ஆசி கூற ஆண்டகையை அடைந்த பீவி பாத்திமத்தே

இறையிடத்தி லிருந்து நாமம் இவ்வுலகி லுடம்பெடுத்தோம்
மறையும்போது அவனிடத்தே மகிழ்ந்து செல்வோம் பாத்திமத்தே

விண்ணவர்க்குத் தண்ணொளியாம் மண்ணவர்க்குக் கண்ணொளியாம்
எண்ணுவோர்க்குப் பண்ணளிக்கும் இன்னொளியே பாத்திமத்தே

என்றுமெந்தன் சிந்தை தன்னை ஈர்த்து நிற்கும் விண்மலரென்
றன்றுநம்மைப் பிரிந்த நாதர் அக நெகிழ்ந்தார் பாத்திமத்தே

தேன் பொழியும் பேருரைகள் தெவிட்டிடாமல் ஈந்து நிற்கும்
வான் புகழும் வள்ளலாரின் வடிவமான பாத்திமத்தே

அன்றுமின்றும் என்றுமொன்றும் அரிய வாழ்வை ஆய்வதற்கு
நின்றிருப்போர் மன்றிலென்றும் நின்றிலங்கும் பாத்திமத்தே

கற்பரசே கனிவரசே கவிதையூறும் மாதரசே
பொற்பரசே பொறையரசே புகழரசே பாத்திமத்தே

மணவிளக்கே மணிவிளக்கே மன விளக்கே மனை விளக்கே
குண விளக்கே குலவிளக்கே குடிவிளக்கே பாத்திமத்தே

நல்ல முத்தே நங்கை முத்தே நல்லறிஞர் செல்வமுத்தே
இல்லறத்தின் இன்பமுத்தே இனிய முத்தே பாத்திமத்தே

இறையுணர்வின் நிறையுருவே இறுதி நபி யின்னுருவே
மறையுரையின் நெறியுருவே மறுவிலாத பாத்திமத்தே

செருக்கொழித்த மருக் கொழுந்தே செம்மையுண்மை சேர் கொழுந்தே
அருட்கொழுந்தே திருக் கொழுந்தே அருங்கொழுந்தே பாத்திமத்தே

கோங்கலரும் பூங்கொடியே குரைஷியரின் குலக் கொடியே
ஓங்கு புகழ் ஒரு கொடியே ஓண்கொடியே பாத்திமத்தே

உயர்சுடரே உயிர்ச்சுடரே ஊனமில்லா ஒளிச் சுடரே
அயர்வகற்றும் மணிச் சுடரே அருட்சுடரே பாத்திமத்தே

நோயகற்ற நோன்பிருந்து நோவகற்றும் நாயகியே
தாய்மையொளிர் தையலர்க்குத் தாயகியே பாத்திமத்தே

வையகத்தின் வான்மதியே வானகத்தின் பான்மதியே
தையலர்க்குத் தண்மதியே தங்கமான பாத்திமத்தே

அன்பு வாழ்வே பண்பு வாழ்வே அரிய வாழ்வே பெரிய வாழ்வே
துன்ப வாழ்வில் இன்ப வாழ்வைத் துலக்க வந்தீர் பாத்திமத்தே

விண்ணினின்று மண்ணிலுற்ற வியப்பளிக்கும் மாசிலாத
தண்மதியாம் போன்றிலங்கும் தகைமையாரும் பாத்திமத்தே

நாவலரும் காவலரும் நாவலோங்கும் பாவலரும்
ஆவலோடு போற்றமாதர் ஆவியானீர் பாத்திமத்தே

மாநிலத்தின் மாரதமாம் மாபெரிய பாரதத்தில்
மாநிலத்தோர் நாரதத்தில் மாண்பொளிரும் பாத்திமத்தே

பாரகத்தின் ஊரகத்தைப் பேரகத்தோர் ஏரகத்தைச்
சீரகத்தோர் நேரகத்தைச் சிவிகையாக்கும் பாத்திமத்தே

வரட்சியோட்டும் வான்முகிலே வளப்பமூட்டும் கார் முகிலே
திரட்சியாக நன்மை சேர்க்கும் திருமுகிலே பாத்திமத்தே

உம்பரேத்தும் அம்புயமே உண்மை நன்மை உறைவிடமே
செம்பொன் கோடி ஈடிலாத செஞ்சொலூறும் பாத்திமத்தே

மதி விளக்கும் மர்ளியாவாம் மாண்பளிக்கும் தாஹிராவாம்
பதி சிறக்கும் நல் ஜஹ்ரா பண்பு காத்தூன் பாத்திமத்தே

பூமலரும் புகழ் மலரும் பொன் மலரின் நன்மலராம்
பாமலரும் நாமலரும் பரவ நிற்கும் பாத்திமத்தே

பள்ளரிய புகழையெல்லாம் பாவெடுத்து கூறவந்த
அன்படியேன் பணியிதுவே அன்பளிப்பே பாத்திமத்தே